Мұнайшылар жолдауды қолдайды
"Айқын"
Атырауға Мемлекет басшысы Нұрсұлтан Назарбаевтың «Төртінші өнеркәсіптік революция жағдайындағы дамудың жаңа мүмкіндіктері» Жолдауының негізгі ережелерін түсіндіру мақсатында республикалық ақпараттық топ келді.
Атырау аймағына осы мақсатта келген Энергетика вице-министрі Болат Ақшолақов «Ембімұнайгаз» АҚ жұмысшы ұжымымен кездесу өткізді. Жиынға Атырау облысы әкімінің орынбасары Жасұлан Сүйіншәлиев қатысты.
Кездесуді алғысөзбен ашқан «ЕмбіМұнайгаз» АҚ басқарма төрағасының бизнесті дамыту жөніндегі орынбасары Бауыржан Балжанов «Елбасының халыққа Жолдауы – еліміздің әлеуметтік-экономикалық дамуының басым бағыттарын айқындап, дамуына арналған маңызды құжат. «ЕмбіМұнайГаз» АҚ ұжымы Елбасының саясатын үнемі қолдап, Жолдауда басым бағыт берген «Цифрлы Қазақстан» бағдарламасын жүзеге асыруды ойдағыдай бастап кетті. Компания тарапынан адами капиталға басымдық көзқарас қалыптасты. Жаңа кеніш орындарын ашып жұмыс орнын сақтап қалу, кадрларды оқыту мен тәжірибесін ұштастыру бағытында жүйелі жұмыс атқарылуда» – деген Бауыржан Құспанұлы компанияда жұмыс істеушілердің еңбекақысы, олардың денсаулығы мен әлеуметтік жағдайын жақсартуға қаражаттар жеткілікті беріліп отырғанын айтты.
Ақиқатында, ембіліктер, Атырау облысының ғана емес, еліміздің дамуына елеулі үлес қосып отыр. Табыс салығын айтпағанда, олар Атырау облысы инфрақұрылымының дамуына, қайырымдылық пен демеушілікке 2,3 млрд теңгеге жуық қаражат бөлген.Жиында Энергетика вице-министрі Болат Ақшолақов кездесудің мақсатын түсіндіріп, өткен жылдың қорытындысына тоқталып өтті.
– Атырау облысы төңірегінде біраз шаруа атқарылды. Өңірдің дамуы жыл сайын артып келеді. Еліміз бойынша өткен жылы біраз жетістіктерге жетті. Оның ішінде, отын-энергетикалық секторында салалардың көрсеткіштері рекордтық деңгейге қол жеткізді. Мұнай өндірісі 86,2 млн тоннаны құрады, облыс бойынша 42,2 млн тонна мұнай өндірілді. Биыл мұнай өңдеу көлемі 1,1 млн – тоннаға артып, 16 млн тоннаны құрайтын болмақ. Кездесудің басты себебі – Елбасының «Төртінші өнеркәсіптік революция жағдайындағы дамудың жаңа мүмкіндіктері» Жолдауында айтылған міндеттерді талқылау, оларды іске асыру жолдарын түсіндіру және ортақ жұмыстар мен бағыттарды нақтылау – деген Болат Оралұлы технологиялық жаңғыру арқасында экономиканы жалпы цифрландыру керектігін сөз етті. Бұдан соң Жолдаудағы анық әрі түсінікті он бағытты саралап айтып жеткізді.
Индустрияландыру жаңа технологияларды енгізудің көшбасшысына айналуы тиістігі міндеттелген Жолдаудың бірінші бағыты бойынша, Энергетика министрлігі өз құзыреті шегінде 2017 жылдан бастап энергетика секторында және экология саласында цифрландырудың бірқатар жобасын жүргізуде. Биыл Атырау және Шымкент мұнай өңдеу зауыттарында автоматтандырылған өндірісті басқару ТОРО жүйесін енгізуі аяқталады. Нәтижесінде, жабдықтың сенімділігін 8-10 пайызға арттыруға, жөндеу шығындарын 10 пайызға төмендетуге, жоспарлы жылдық жөндеу жұмыстарының мерзімін 45 күннен 25 күнге дейін төмендетуге мүмкіндік болады. Энергетика вице-министрі Б.Ақшолақовтың айтуынша, Жолдаудың міндеттерін орындау шеңберінде шикізатты өңдеуді тереңдету қажеттілігіне маңыз берілуде. Сондай-ақ биыл «Ембімұнайгаз» кен орындарында (С. Нұржанов, Ақтөбе, Досмұхамбетов, Батыс Прорва) және «Қазгермұнай» ЖШС БК кен орындары (Ақшабұлақ, Нұралы, Ақсай кен орындары) «Интеллектуалды кен орын» және «Қазатомөнеркәсіп» кен орындарында «Цифрлы кеніш» пилоттық жобалардың аяқталуы күтілуде.
Жиында Энергетика вице-министрі Болат Ақшолақов Министрлік пен әкімдіктермен қазіргі жұмыс нәтижелерін саралап айтып, Елбасы тапсырған міндетті орындау үшін электр жабдықтау саясатын қайта қарастыру және деректерді цифрлау, үдістерді автоматтандыру бойынша жаңа технологиялар енгізуге ерекше көніл аударудың мезгілі келіп тұрғанын ескертті.
Елбасы Жолдауы – елдің өркениетті елдермен қатар иық тірестіріп дамуына даңғыл жол көрсеткен маңызды құжат. Осы құжатта көрсетілген міндеттер орындалуымен маңызды. Сондықтан да атыраулық мұнайшылар Жолдаудағы міндеттерді атқарудағы жауапкершілікті түйсініп отыр.
Тұрсын ҚАЛИМОВА
Атырау облысы
