«Ембімұнайгаз» АҚ-да Басқарма төрағасының өндіріс жөніндегі жаңа орынбасары тағайындалды
2019 жылғы 26 тамызда ЕМГ кадрлық ауысым орын алды. Компанияның бас кеңсесінде басшылық құрамы мен департамент директорларының қатысуымен өткен жиында «ҚазМұнайГаз» Ұлттық компаниясы» АҚ мұнай-газ өндіру жөніндегі басқарушы директоры Абат Нұрсейітов Басқарма төрағасының өндіріс жөніндегі жаңа орынбасары Қанатбек Махмудұлы Қасымғалиевты таныстырды.
- ЕМГ директорлар кеңесінің 2019 жылғы 23 тамыздағы №33 шешімімен Қанатбек Махмудұлы Қасымғалиев Басқарма төрағасының өндіріс жөніндегі орынбасары болып тағайындалды. Қанатбек Махмудұлы бұл ұжымға бөтен адам емес. Еңбек жолын Ембі өңірінен бастап, өздеріңізбен қоян-қолтық жұмыс жасап шыңдалған азамат. Шетелде білімін жетілдіріп, бас компанияда қызмет атқарып, тәжірибе жинақтады. Үлкен жауапкершілік жүктеліп, осы лауазымға тағайындалып отыр, - деді Абат Нұрсейітов.
Қасымғалиев Қанатбек Махмудұлы
Білімі: И.М.Губкин атындағы Ресей мемлекеттік университеті (мамандығы «Мұнай-газ кен орындарын пайдалану және игеру»).
Еңбек жолын 2001 жылы «Құлсарымұнайгаз» МГӨБ-нің Қаратон кен алаңында Терең-Өзек МГӨЦ мұнай-газ өндіру операторы болып бастады. «Құлсарымұнайгаз» МГӨБ-нің Терең-Өзек МГӨЦ технологі, «Жылыоймұнайгаз» МГӨБ өндірістік-технологиялық қызметі жетекшісінің орынбасары, бас инженері, «Ембімұнайгаз» АҚ мұнай-газ өндіру бөлімінің басшысы, мұнай-газ өндіру департаментінің директоры, «Жылыоймұнайгаз» МГӨБ басшысы, «Ембімұнайгаз» АҚ бас директорының өндіріс жөніндегі орынбасары, «Ембімұнайгаз» АҚ Басқарма төрағасының өндіру және игеру жөніндегі орынбасары қызметтерін атқарды.
2017 жылдың қыркүйек айынан бастап 2018 тамыз айы аралығында «Ембімұнайгаз» АҚ кен орындарын игеру жөніндегі басқарушы директоры лауазымында еңбек етті. 2018 жылдың тамызынан 2019 жылғы тамыз аралығында «ҚазМұнайГаз» Ұлттық компаниясы» АҚ мұнай-газ өндіру департаментінің директоры лауазымында болды.
Марапаттары:
«Ембімұнайгаз» ӨФ Құрмет грамоталары, ҚР Мұнай және газ министрлігінің Құрмет грамотасы (2012 ж.), «Прорва мұнайына - 50 жыл» төсбелгісі (2013 ж.), ҚР Энергетика министрлігінің «Ембімұнайгаз» АҚ - 95 жыл» мерейтойлық медалі (2017 ж.).
