Ақпараттық хабарлама 06.05.15 ж.
Ақпараттық хабарлама 06.05.15 ж.
«Ембімұнайгаз» АҚ қызметкерлері арасында Ұлы Жеңістің 70 жылдығы мерекесіне орай «Бейбіт күн тілегі» атты өнер байқауы өтті. Байқау 2 номинация бойынша ұйымдастырылды. Сайыскерлер көркемсөз оқудан және ән айтудан сынға түсті. Оларға қойылған талап ортақ: байқауда орындалатын көркемсөз де, ән де соғыс жылдарындағы қиыншылықтарға, тылдағы ауыр еңбекке арналуы шарт.
- Байқаудың мақсаты- Ембі кен алаңдарында еңбек етіп жатқан 5525 адамның байланысын нығайту, мұнайшылардың ынтымағын артыру. Осы орайда ұйымдастырылған бұл байқауға бағын сынамаққа келген әрбір сайыскер өзі еңбек ететін ұжымның намысын қорғаумен қатар, ата-бабалар рухына тағзым етеді. Сайыстың тағы бір ерекшелігі осы сахнада айтылатын ән жанды дауыспен орындалуы шарт- деп «Ембімұнайгаз» АҚ Бас директорының орынбасары Рысты Тасмағамбетова байқаудың талаптарына қысқаша тоқталып өтті.
Көркемсөз оқудан топ жарған Света Жылқышиева («Жайықмұнайгаз» МГӨБ) К.Симоновтың «Жди меня» жыр жолдарын оқыса, ән байқауынан Жаннат Өтепова («Доссормұнайгаз» МГӨБ) үздік шықты.
Жеңімпаздар арнайы дипломдармен, теледидар, ноутбук, планшет сияқты бағалы сыйлықтармен марапатталды. Байқауда белсенділік танытқан өзге сайыскерлерге де көтермелі сыйлықтар табыс етілді.
«Ембімұнайгаз» АҚ баспасөз қызметі
