2015 ж. 30 қазан күні «Ембімұнайгаз» АҚ бас кеңсесінде «Халық қаһарманы» Айдын Айымбетовпен кездесу өтті.
2015 ж. 30 қазан күні «Ембімұнайгаз» АҚ бас кеңсесінде «Халық қаһарманы» Айдын Айымбетовпен кездесу өтті.
Ұшқыш-космонавт А.Айымбетов жұмыс сапарын өзінің туған өлкесі- Талдықорғаннан кейін Атырау облысынан бастап отыр.
«Халық қаһарманымен» болған кездесуге «Ембімұнайгаз» АҚ Орталық аппараттың қызметкерлері, «АМӨЗ» ЖШС, «КазТрансОйл» АҚ Батыс филиалының ұжымдары қатысты.
Кездесу барысында Айдын Айымбетов мұнайшыларға ғарышқа сапар барысын, алған әсері туралы баяндап берді. Сапар кезіндегі атқарылған ғылыми жұмысқа жан-жақты тоқталды.
- Бүгінгі таңда Астана қаласында сынақ жұмыстары атқарылатын кешен құрылысы жүріп жатыр. Азия мен ТМД бойынша алғашқы болып Қазақстан мемлекеті ғарышта жобалау жұмыстарынан басталып сынақ шаралары толық атқарылатын кешенге қол жеткізбекші. Бұл-еліміздің үлкен жетістігі,-деген «Халық қаһарманының» сөзін мұнайшылар ду қол шапалақтаумен қолдап отырды.
А.Айымбетов бортта әр түрлі ұлт өкілдерінің арасында орнаған жылы қарым-қатынасты ерекше атап өтті. Ұшқыштар ғарышқа сапар кезінде бір-бірімен пікір алмасып, қол ұшын беріп, елдерінен ала келген ұлттық тағамдарымен бөлісіп, достық байланыс орната білген.
- Ғарышқа көтерілгенде Жердің соншалықты үлкен емес екеніне көз жеткізесің. Жерден алыстаған сайын оның қымбаттылығын, қасиетін ерекше сезінеді екенсің. Ғарыш кеңістігінде өмірге көзқарасың өзгеріп, әлемді басқа қырынан танығандай боласың. Өзіңді сондай еркін сезінесің,- деп ұшқыш-космонавт ғарыш сапарының жылы әсерлерімен бөлісті.
Кездесу барысында мұнайшылар А.Айымбетовке сұрақтарын қойып, жылы пікір алмасу орнады. Шара соңында мұнайшылар «Халық қаһарманымен» естелік суретке түсті.
Анықтама: Айдын Айымбетов Ақанұлы 1972 жылдың 27- шілдесінде Талдықорғанда дүниеге келген. Қазақ ұлтынан шыққан ұшқыш-космонавт.
«Халық қаһарманы» (2015 ж.), Қазақстан ӘҰҚ полковнигі, 2015 жылдың 2-12 қыркүйек аралығында бортинженер ретінде ғарыш сапарын орындады. Ғарыш сапарының ұзақтығы – 9 күн 20 сағат 13 минут 51 секунд. Айдын Ақанұлы- Халықаралық ғарыш стансасының ЭП-18 экспедициясының мүшесі.
