«Ембімұнайгаз» АҚ Директорлар кеңесінің өкілеттік мерзімі 2023 жылға дейін ұзартылды

16 қыркүйек, 2020

«ҚазМұнайГаз» ҰК» АҚ (бұдан былай КМГ ҰК) «Ембімұнайгаз» АҚ (бұдан былай ЕМГ) Директорлар кеңесінің өкілеттік мерзімін 2023 жылдың қыркүйек айына дейін бекітті. ЕМГ Директорлар кеңесінің құрамы 6 адамнан тұрады: 4 КМГ ҰК өкілі- Марабаев Жақып Нәсіпқалиұлы, Қайыржан Есен Қайыржанұлы, Хасанов Дәулетжан Кеңесұлы, Бекназарова Айгүл Жақсықұлқызы және 2 тәуелсіз директор- Ертлесова Жаннат Жорғалиқызы, Ізбасов Мақсым Шафихұлы.  

БАҚ үшін анықтама:

«Ембімұнайгаз» АҚ – «ҚазМұнайГаз» Ұлттық компаниясы» АҚ еншілес кәсіпорны. «Ембімұнайгаз» АҚ тарихы 1922 жылы Доссор және Мақат кен орындарын игеру мақсатында «Ембімұнай» тресі құрылған кезеңнен бастау алады. Компания қызметінің негізгі бағыттары: геологиялық барлау, мұнай-газ кен орындарын игеру, мұнай мен газды өндіру және дайындау. «Ембімұнайгаз» АҚ құрамына Атырау қаласы мен облыстың 4 ауданындағы алты өндірістік-құрылымдық бөлімше кіреді. Олар: «Доссормұнайгаз», «Жылыоймұнайгаз», «Жайықмұнайгаз», «Қайнармұнайгаз» мұнай-газ өндіру басқармалары мен екі құрылымдық мекеме: «Ембімұнайэнерго», «ӨТКжЖК» басқармалары. «Ембімұнайгаз» АҚ өндірілген мұнайды ішкі нарыққа жіберумен қатар, экспортқа да шығарады. Ішкі нарыққа мұнай ҚР мұнай өңдеу зауыттары арқылы жеткізіледі. Ал, экспортқа мұнай екі негізгі маршрут: Каспий Құбыр Консорциумы (ҚҚК) және Өзен – Атырау – Самара (ӨАС) құбыр желілері арқылы шығарылады. Тауарлық газ жобасы ҚР газ және газбен қамту саласындағы ұлттық оператор «ҚазТрансГаз» АҚ арқылы жүзеге асады. «Ембімұнайгаз» компаниясы акционерлік қоғам болып құрылған 2012 жылдан  бастап 2020 жылдың бірінші жартыжылдығы аралығында республикалық және жергілікті бюджетке салық төлемдері ретінде 1 трлн 177 млрд. теңгеден астам, өңірдің инфрақұрылымын дамытуға – 4 млрд 600 млн теңгеден астам қаражат аударды. «Ембімұнайгаз» АҚ ISO 9001, ISO 14001, OHSAS 18001, ISO 50001 халықаралық стандарттарға сәйкес жүргізуде.